Oscar Mansoren "Su guztiak"
Asteazkena, 2014-01-29"Su guztiak" izeneko poema bidali digu Oscar Manso idazle errenteriarrak, gazteleraz idatzitako jatorrizkoaren itzulpena. Mansori Breve historia de los conquistadores (batBada/Mikelazulo, 2010) poemarioa irakurri diogu lehenago, eta musikari gisa ere Kakahuete izeneko taldean entzun ahal izan dugu.
.
SU GUZTIAK
Su guztiak, su bakarra
Julio Cortazar
Jorge Luis Borges
beltza eta esklabo jaio zen
ez zuen sekula irakurtzen ikasi
ez daki idazten
Ez da existitzen El Aleph
ez Funes oroimentsuari buruzko
inolako kontakizunik
Hirugarren Reicheko
mundu ordena berriaren pean
ez dago lekurik Kafkarentzat
ez Einstein edo Philip Rothentzat
Stanley Kubrick Roman Polanskirentzat
Guztiak hil dira gaur
Lehergailu bat jausi zen Bruselan
Julio Cortazar jaio berriaren gainean
Ez da existitzen Rayuela
Ez dago kronopiorik ez famarik
Heriotza guztiak heriotza bakarra
Bala galdu batek
albo kaltea
bilakatu du Melville
zenbaki bat
Ez da existitzen Moby Dick
Atenasek
Espartak konkistatua izanik
bere filosofo guztiak ikusi ditu hiltzen
Ezpatapean jausi da Aristocles
Platon legez deitua izan baino askoz ere lehenago
Ez dago klabikordiorik Somalian
Mozart txikiarentzat
Itsu eta gose
inkontzienteki imitatzen du
hienen kantu iluna
gerturatzean
Gabriel Garcia Marquez
Columbineko ikasle ameslaria zen
Bere ondasunen artean topatu zen karpeta bat
literaturako apunteekin eta poema bat idazteko
ahalegin birekin
Federico Garcia Lorca
Roque Dalton
Marco Tulio Ciceron
Leonardok behar ez zuen gizona
maitatzeko akatsa egin zuen
Eskuak anputatu zizkioten
begiak itsutu
betirako ilundu haren ezpainak
harriaren fereka hotzarekin
Guztiak hil dira gaur
zifren artean uzkurturik
John Steinbeck 204. biktima da Bagdaden
Virginia Woolf 58.a Kabulen
Cervantes 72. presoa inon ez dagoen kartzela batean
Eman diezaiegun izen bat
tragedia neurtzeko
Sakrifikatua izan den Fiodor Dostoievskik ez ditu jainkoak asetzen
baina herriak lasaiturik egiten du hasperen
artoa hazten ikustean
Gozotasun infinituak torturaturik eta anputaturik
jauzi da Alejandra Pizarnik
Infanteriako peoiak sakrifikatu behar badira
hor doaz Quevedo nerabea
Kavafis bizargabea
Bolaño despistatua
Erregeari zuzendutako bala geratu behar denean
horra egin du salto Tom Waitsek
inork ez du uste Leonard Cohen galera handia denik
Parra familiak egingo du soilik negar Nicanor argitaragabeagatik
Kenzaburo Oé Hiroshiman
Kawabata Nagasakin
Su guztiak
su bakarra non
erre egiten diren gizaki guztiak
gizaki bakarra
Izen guztiak
gure izena
Oscar Manso errezitaldi batean. Argazkia: Joseba Barrenetxea.