Erika Elizari Irakurrieran irratsaioan
Ostirala, 2021-10-29Erika Elizari elkarrizketatu du Garazi Albizuak Irakurrieran irratsaioan, Bizkaia irratiaren eta Euskal Idazleen Elkartearen eskutik.
Erika Elizari elkarrizketatu du Garazi Albizuak Irakurrieran irratsaioan, Zendabalitz (Elkar, 202o) liburuaren harira. Jarraian entzun dezakezue saioa osorik:
Sinopsia
Parisko Charles de Gaulle aireportutik Loiukora doan hegaldia. Barruan hamaika bidaiari eta beste hainbat istorio: lan-elkarrizketa batera joan eta haurdun dagoela ezkutatu duen exekutiboa; barruko bulkada suntsikorrei aurre egin behar dien pilotua; egungo bikotekideari aurretik ezkonduta egon zela kontatzera ausartzen ez den emakumea; oporretan bakarrik abentura bila joan eta aspertu besterik egin ez den neska gaztea; alargun dagoenetik bizipozik ez daukan medikua; ondoko pasaiariarekin ligatu edo ez pentsatzen doana; bidaiari eta tripulaziokideak nazkatzen dituen gizonezko petrala…
Elene, Gabriel, Paule, Xabier, Enara, Malox, Sukaina… Eleberri koral bat sortu du Erika Elizarik Igartza sariari esker idatzitako bere estreinaldi honetan: nobela labur, fresko eta dibertigarria, gizon-emakumeen baitako kontraesanekin eta gizartearen estereotipoekin jolas egiten duena; itxuragatik aurreko pertsonari suposatzen diogun errealitatea ez baita beti bere barruko egiarekin ezkontzen, ezta norberak bere buruaz uste duena eta gero benetan egiten duena ere. Zatoz zu ere hegazkinera, eta hasi kuxkuxean aulkiz aulki, bidaiarien maletetan eta kontzientzietan arakatzen, ziur ez zarela aspertuko.
Bestalde, hemen irakur dezakezue Elizariri egin genion elkarrizketa: «Buruari eragitea gizarte osoaren ezaugarria dela iruditzen zait, eta hori egiten zait interesgarri»