Jon Alonsok "Naparra, kasu irekia" saiakera aurkeztu du
Astelehena, 2020-11-16Jon Alonso idazleak Naparra: kasu irekia saiakera publikatu du, Elkar argitaletxearen eskutik eta Tene Mujika sariaren laguntzaz. Bertan, Jose Miguel Etxeberria Alvarez "Naparra"ren kasua ikertu du egileak, orain arte dauden datu guztiak bilduz eta zehatza antolatuz, eta haren desagerpenaren inguruko susmoak gogoratuz.
Sinopsia:
Jose Miguel Etxeberria Alvarez “Naparra”, Komando Autonomo Antikapitalistetako militantea eta Iparraldean errefuxiatua, 1980ko ekainaren 11n desagertu zen, norbaitek bahitu eta eraila. Ordutik ez da haren gorpurik agertu, ez desagerketaren egileez edo xehetasunez berri zehatzik jakin.
Jon Alonsok, era bateko eta besteko iturrietara joz, ikerketa zabal eta sakon bati ekin dio, kasu horretaz dakigun guztia biltzeko, baita suma dezakeguna iradoki eta ilunpean dagoena gogorarazteko ere. Naparra kasuaz hitz egitean, baina, gutxien-gutxienez bi kasu hartu behar ditugu aintzat: bata, indarrez desagerrarazi zuten borrokalari gazte, argi eta kementsuaren historia lazgarria; eta bestea, semearen (eta anaiaren) arrastoaren bila berrogei urtez batera eta bestera joz eta askotan bakardadean, modu nekaezinean jardun duen familiaren historia, aurrekoa bezain lazgarria edo agian lazgarriagoa.
Biak landu eta jorratu ditu egileak Tene Mujika sariaren laguntzaz idatzitako lan honetan, gure memoria argituz eta astinduz; izan ere, noizbait denontzat bizigarria izango den herri bat eraikiko badugu, bidean gertatu diren izugarrikeria guztiak hartu beharko baitira gogoan.
Jon Alonso Fourcade
1958 Iruñea (Nafarroa, Euskal Herria)
Aurkezpen honen uberan:
Argia: 'Naparra'-ren desagertzeari buruzko ikerketa-liburua argitaratu du Jon Alonsok.
Naiz: ‘Naparra kasu irekia’, militante baten desagerpena eta familia baten sufrikarioa.