Sinadurak

Oihana Aranaren poema: «Ahoa lorez beteta»

Asteartea, 2021-11-02

Ahoa lorez beteta

 

«zoriona konfeti inpresionista balitz bezala»

-Miren Agur Meabe

 

Udazkeneko ostiral arratsaldetan

egongelako lurrean fruta arbolak

sartzeko irrika aberetiarrak jaten dit

 

Parketa azkazalekin erauzi

eta gaztainondoen

sustraiei hozka egiteko grinak.

 

Lurra eskobatzen irudikatzen dut nire burua gero

maldizioka. Arbolari hostoei eusteko erregutzen.

Sustraiak eta fruituak lortzeko

lurretik hostoak kendu behar izate horrek sortzen didan amorrua da

irrikak baretu

eta arrazoiz jokatzera naramana;

jardinera bete geranio zaintzeko

gai izango ez naizela

gogorarazten didan argi gorri berbera da.

Erdi hilda dauden kaktusei ura bota behar diedala

gogorarazten didana ere bai.

 

Berez gurago ditut loreak fruta arbolak baino.

Egongelako lurrean jasmin zuhaixkak landatzeko

irrikarik ez dut inoiz sentitu, hala ere.

 

Gustura egingo nuke oka

aldiro ahotik jasmin hostoek

egingo balidate ihes.

 

Edertasun gorena usain gozo bat da

eta usain gatzilak bizitzaren antitesia.

 

Betiko biziko nintzake

mingain puntatik jasmin loretxoak kentzen

oroitzapen udatiarrak sakralizatzen:

biznaga bat eskaini didan gizonari

ahoarekin ezetz esan

eta begiekin eskerrak eman ahal izateko.

 

Oraindik ez du konprenitu

edertasuna eskuetan izatea ez dela komenigarria;

bizigarriagoa dela lurrin bila paseoan ibiltzea,

baina lore bat eskaintzen dizunak

merezi du gutxieneko keinu hori.

 

Ojala beti jasmin hostoak

izango banitu ahoan.

Ojala azkar ikasiko balute

mingainetik eskuetarako bidea

zein den.

 

Ez da horren erraza, ordea.

Udazkena da beti gorputz barru honetan;

zailagoa den arren, ohikoagoa zait

ahotik gaztaina osoak botatzea

morkots eta guzti.

 

Eta akaso, praktikoagoa da.

Denok bota nahi ditugu-eta

loreak ahotik, baina

ez dakit inork eduki nahiko duen

ahoa lurrez beteta.


Oihana Aranaren aurreko sormen-lanak

«Diplotaxis tenuifolia»

«Bitxilorezko idunekoa»

 

Utzi zure iruzkina
      "Hegoak _______ banizkio, nirea izango zen" (derrigorrezkoa, spam-aren kontra)