Mari Luz Estebanen liburu gomendioa
Hallgrimur Helgason idazlearen Una mujer a 1000º proposatu diguAsteazkena, 2014-03-05Mari Luz Estebanek Amaren heriotzak libreago egin ninduen izeneko poesia liburua kaleratu zuen iaz Pamiela argitaletxearen eskutik. “Askatasuna, heriotza, maitasuna, semealabatasuna, adiskidetasuna, amatasuna/gurasotasuna, sexualitatea, desira, ‘emakume izatea’, denbora” bezalako gaiak landu zituen. Solaskide izan genuen Hitzen Uberan. Orain, liburu gomendio batekin datorkigu. Hallgrimur Helgason islandiarraren Una mujer a 1000º (Lumen, 2013) proposatu digu. “Historiarako pertsonaia oparitu digu: Herra. Ez da izen euskalduna baina noiz edo noiz kasualitate bikainak gertatzen dira”, Mari Luz Estebanek ondoko gomendioan aipatzen duenez.
Hallgrimur Helgason: Una mujer a 1000º (Lumen, 2013)
(Itz.: Enrique Bernárdez Sanchís)
80 urte ditu eta Reykjavik-eko garaje batean bizi da, oheari loturik. Bere ondare guztia: internetera konektaturiko ordenagailu eramangarri bat, zenbait tabako-pakete eta eskuko granada zahar bat. Noiz hilko den erabakia du eta hitzordua egina du errausketa-labe batean. Bien bitartean, dramaz eta bitxikeriez jositako bizitza kontatzen digu, XX. mende osoko historia kritikoa ere badena. Aitona Islandiako lehen presidentea izan zen eta aita nazien alde aritu zen; seme bat galdu eta besteengandik urrundua dago aspaldi; gizonenganako maitasuna eta desira ezagutu arren beraien gutxiespena eta indarkeria ere dastatu ditu behin baino gehiagotan...
50% errealitate eta 50% fikzio, zorroztasunaz eta ironiaz idatzi du bere herrian polemika piztu duen liburu hau Hallgrimur Helgason idazle, kazetari eta margolari islandiarrak. Eta Historiarako pertsonaia oparitu digu: Herra. Ez da izen euskalduna baina noiz edo noiz kasualitate bikainak gertatzen dira.
Orokorrean ez naiz eleberri luze zalea; une batean edo bestean egileak adarretatik joaten direla iruditzen zait. Baina 640 orrialde hauetan gutxi dago soberan. Emakume askeak eta lotsagabeak gogoko badituzu, hau da zuretzako liburua.
Mari Luz Esteban
