Aurtengo literatur amuak
Asteazkena, 2020-07-29Hitzen Uberan atarian gogoko dugu hango eta hemengo literaturgileen amuak ekartzea irakurleari. Urte bitxi honetan hala egin dugu, eta, udako atsedenaldiari heldu aurretik, zerrenda honetan bildu dizkizuegu gure gutiziak.
«Nerudaren postaria» antzezlana, Booktegin
Antonio Skarmetak idatzitako liburuan oinarrituta, Nerudaren postaria antzezlana taularatu zuen Maskarada taldeak 1997an, Patxo Telleriaren itzulpenarekin. Booktegik berreskuratu du testu hura, «Drama» atalean publikatu duen liburu elektronikoan. (Argazkia: Il Postino filmako irudia).
Amua, hemen.
Sheila Heti, edo nola izan pertsona bat
Nolakoa izan beharko litzateke pertsona bat? Sheila Heti-k (Kanada, 1976) galdera hori jarri zion izenburu 2010ean plazaratutako nobelari (gazteleraz 2013an publikatu zuen Alpha Decay argitaletxeak, ¿Cómo debería ser una persona? Una novela desde la vida tituluarekin). Autofikziotik asko duen narrazio honetan, Sheilak bere burua jarzen du kontakizunaren erdigunean. Askotarikoak izango dira jorratuko diren gaiak, eta guztietan emakumearen, artistaren, idazlearen, egunerokotasuneko ezintasunetan galdutako pertsonaren ezbaiak kontatzen dira, grisa nagusi den jarreretan, gauzak zuri edo beltz ikusteko belaunaldi-ezintasunean, umorez kontatuko ditu egileak ahots nagusiaren gorabeherak, ironiaz mukuru.
Amua, hemen.
Ingeborg Bachmannek duela mende erdi idatzitako narrazio gaur egunekoak
Pasa den irailean argitaratu zen Ingeborg Bachmann idazle austriarraren Aldibereko (Erein eta Igela, 2019) ipuin-liburua, Literatura Unibertsala bildumaren barruan. Idoia Santamariak ekarri du euskarara. Santamaria elkarrizketatu dugu, eta aukera aprobetxatu dugu, orobat, Bachmanni buruzko amu (pertsonal samar) bat osatzeko.
Amua, hemen.
Aitor Kaltzakorta eta Goiatz Labandibar, Pasaia Hiria lehiaketako liburuan
Liburu batean argitaratu dute XX. Pasaia Hiria sariketako emaitza, bi poesia lanez osatutako: Aitor Kaltzagorta Belaustegiren Euria zara-zara, eta Goiatz Labandibar Arbelaitzen Interpretazioak G Minorren. Bakoitzetik ale bana ekarri dizuegu amu honetara.
Amua, hemen.
Poema bat eta hiru dantza... eder?
Etxe barruko mugimenduari eusteko Nick Caveren poema labur bat, eta Cave beraren, Michelle Gurevich-en eta The Knife-ren dantza bana proposatzen dizkizuegu. (Argazkia: Lovers are strangers, Michelle Gurevich kantariarena).
Amua, hemen.
Amaia Irazabalen poemak irakurgai
Amaia Irazabal aktore gisa ezagutu dugu orain arte, batez ere antzerkian, baina baita ere telebista eta hamaika filma laburretan. Oraingo honetan, bere poemak ezagutu ahal dituzue. On egin!
Amua, hemen.
Angélica Freitasen bi poema
Amu honetan, Angélica Freitas poeta eta itzultzaile brasildarraren bi poema euskaratu ditugu, biak ere um útero é do tamanho de um punho [umetokia ukabil baten neurrikoa da] liburuan bildutakoak.
Amua, hemen.
Adrienne Richek amatasunaz idatzitako klasikoa argitaratu du Txalapartak
makumeagandik jaioak: Amatasuna esperientzia eta instituzio gisa izeneko saiakera mardula kaleratu zuen Adrienne Rich poeta eta pentsalariak 1976an. Amatasunaren esperientzia eta instituzioa abiapuntutzat hartuta, errepaso historiko zabal bat eskaintzen du Richek, estilo literario nabarmenaz. Maialen Berasategi itzultzaileari egindako elkarrizketa irakurri aurretik, tori amu hau.
Amua, hemen.
Forugh Farrokhzad eta June Jordan poeten antologiak MPK bilduman
Liburu hauekin 34. zenbakira heldu da Susa argitaletxearen Munduko Poesia Kaierak bilduma, Beñat Sarasola zuzedari duela. Pasa den astean aurkeztu zituzten Forugh Farrokhzad eta June Jordan poeten antologiak. Dagoeneko iritsi dira bildumako harpidedunen buzoietara, eta liburu-dendetako erakusleihoetara.
Amua, hemen.
Eskailerapeko: Karmele Jaioren etorkizun-fabula
Karmele Jaiok Eskailerapeko izeneko fabula argitaratu du «Zirriborroak eta gero» egitasmoaren barruan, Raisa Álavaren irudiekin. Zaintzarako auzo-sareak abiapuntutzat hartuz, fikzio espekulatibo bat osatu du konfinamendu garai betean. Irudia: Zirriborroak eta gero.
Amua, hemen.