Aingura hegodunak

Maiatz aldizkariaren 58. alea zabaldu berri dute, 2014ko udaberriari dagokion zenbakia. Ohiko moduan, askotarikoak dira orriotako ahotsak eta generoak. Ale berri honetan pisu nabarmena du 1914ko gerrak, aldizkariaren hasierako orrietan. Maiatzek eskaini ohi dituen harribitxien artean, aipatzekoa da Jakes Lafitteren Euskaldunak Araban pastorala osorik irakurtzeko aukera. Guk Irati Murua eta Ekhiñe Egiguren Azkuneren berbak gerturatu nahi izan dizkizuegu lagin gisa.

“Japoniar guztiak ez dira samurai, Japoniako ziza guztiak ez dira shitake, eta Japoniako poesia guztia ez da haiku”. Josu Jimenez Maiaren hitzak dira hauexek. Liburu gomendio eske hurbildu gara Nafarroako idazle honengana, eta guk eskainitako tartea Japoniako poeta baten berri emateko baliatu du. Toyo Shibata poetaz mintzo zaigu ondoko lerroetan. Gomendioa igortzearekin batera, bere poema bat ere ekarri du euskarara.

Honakoan, Mikel Valverde artista plastikoarengana hurbildu gara liburu gomendio eske. Begi onez hartu du gure eskaintza eta, bueltan, George Pelecanosen Sin retorno liburuari buruzko lerro hauek igorri dizkigu. Kirmen Uribe, Mikel Urdangarin, Rafa Rueda eta Bingen Mendizabalekin batera, Jainko txiki eta jostalari hura (Elkar) disko liburuan hartu du parte Mikel Valverdek. Horretaz gain, liburu askotako portadak ere bere sinadura daramate.

Mari Luz Estebanek Amaren heriotzak libreago egin ninduen izeneko poesia liburua kaleratu zuen iaz Pamiela argitaletxearen eskutik. “Askatasuna, heriotza, maitasuna, semealabatasuna, adiskidetasuna, amatasuna/gurasotasuna, sexualitatea, desira, ‘emakume izatea’, denbora” bezalako gaiak landu zituen. Solaskide izan genuen Hitzen Uberan. Orain, liburu gomendio batekin datorkigu. Hallgrimur Helgason islandiarraren Una mujer a 1000º (Lumen, 2013) proposatu digu. “Historiarako pertsonaia oparitu digu: Herra. Ez da izen euskalduna baina noiz edo noiz kasualitate bikainak gertatzen dira”, Mari Luz Estebanek ondoko gomendioan aipatzen duenez.

Irati Bediaga Galdakaon jaio zen, 23 urte ditu eta iaz bere lehen liburua plazaratu zuen: Beldarren hegaldia (Elkar), 10 urtetik gorako gaztetxoei zuzenduriko ipuina. Lehen pertsonan idatzitako narrazioa da. Nahia 10 urteko neskatila bat da, inguruak bultzatuta ballet ikasteko izena ematen duena, baina ez da oso eroso sentitzen dantza klasikoan. Haurtzaroan izaten diren beldur eta konplexuak umorez eta trebeziaz lantzen ditu, baita haurraren bizitzako alderdi desberdinak ere: lagunartea, familia, barne mundua… Guztia ere sentiberatasunez eta alaitasunez kontatuta. Lan honekin, Mikel Zarate haur literaturako saria irabazi zuen. Gomendio eske hurbildu gara eta hauxe da Irati Bediagak proposatu digun irakurketa: Anna Gavaldaren Juntos, nada más (Seix Barral, 2004).

Berreskuratu beharreko poeta eta pertsona da Nâzim Hikmet turkiarra. Hala dio Mikel Ibarguren idazleak. Eta horregatik bere liburu jakin bat baino, bere obra poetiko osoa proposatu nahi digu. Dimentsio handiko poeta eta gizakia iruditu izan zaio beti: "Hikmeten poesia poesia bitala dela esango nuke. Poemek askotan anekdota edo detaile baten garapenak dirudite; sinpletasunetik abiatu eta poema egin arteraino heltzen direlarik. Plazer bat da bere literatur lanak irakurtzea".